Etukuko lomukifi wo HFMD walopotwa moshitopolwa sha ‘KwaZulu-Natal, mo S.A

Oshikondo shouhaku mo South Africa,  omandaxa osha pula oshiwana shingungumane noku kala shili okamutwe vandu shalandula ketukuko lomukifi wokeenyala, mokanya no keemadi(HFMD) moshitopolwa sha ‘KwaZulu-Natal.

Momukanda oo watuminwa okwa kwashilipaleka oshikondo  tashilongo nelitulemo noku longela kumwe noshikondo shopashiwana osho hashi ungaunga nomikifi hadi tandavele noku tonatela onghalo oshoyo oku yandja eyambidido opo tashi pumbiwa oshoyo oku tala keenghendabala dokuya moshipala etandavelo lomukifi.

Eelopota oda ulika kutya fiyo opapa moshitopolwa sha KwaZulu-Natal, omwa lopotwa ovanhu veli va 6 vaningwa oihakanwa yomukifi   valopotwa pokati komafiku  6-10 Feb 2025 no muvalu owa hapupala okuya povanhu vefike   168,  ovo vadidilikwa momudingonoko  wa  Durban.

Omukanda nande ongaho taukumike oshiwana kutya ina shipumbwa oku kala shina oumbada molwaasho ovanambelewa vouhaku oveli metifa lo kutonatela.

Nande ongaho omukanda owayandja yoo ekunghililo kovadali no vafilishisho vounona vakale vakotoka unene ngenge vadidilika omadidiliko ena ekwatafano nomukifi oo ngaashi oshoombo, oipute pomunino, eloloko, ekanifo lokulya, oipulu mokanya nokelaka, etukuko leembulwa peke oshoyo oipute keemadi.