Ovanaudu vomukifi wo Mpox vaya onapo okudja moipangelo ya DRC

Konyala ovanaudo vomukifi wo Mpox vedulife po 500 ovaya onapo okudja moipangelo ta ihangwa moushilo woshilongo Democratic Republic of Congo oyo ya ponokelwa kee Rebels.

Ovanambelewa voshikondo shouhaku okudja mendiki loku kelela noku tonatela omikifi mu Africa (Africa CDC),  ovati onghalo yo vanaudu vafadukapo oyili tayeetififa oumbada noku tula moshiponga etandavelo lomukifi mokati koshiwana, omukifi oo taku feekelwa nale wadipaya omuvalu wo vanhu vefike po 900 mo DRC omudo wadjako.

Ovanaudu ova fadukapo okudja momandiki ouhaku ngaashi oo tahangwa mo  Goma nomo Bukavu – oilando yakula oyo ya kwatwako kee rebels do M23 tadi tuwa epepe koshilongo Rwanda.

Dr Samuel Muhindo, moshikondo shouhaku talombwele oshikundaneki sho BBC,  kutya oipangelo oya ningilwa ominyonena do maponokelo no ikwafifo youhaku ihapu oveikanifa.

Omukifi wo Mpox oo wakala nale ushiivike nedina  epulu loomunghima  (monkeypox) -oha weetelele omadidiliko ngaashi oitulututa yeembulwa koshipa, omutwe oshoyo oshoombo.

Shelikwatelela kendiki lo Africa CDC, olati okudja pehovelo lomudo ou, ovanhu vefike po 2,890 ovaningwa oihakanwa yomukifi wo mpox omanga 180 valopotwa vaxulifa mo DRC.