Omangu onghela oya yandja elombwelo opo Amushelelo amangwepo

Omutokoli momangu yo pombada ya Windhoek Anne-Doris Hans-Kaumbi, onghela komatango okwa yandja elombwelo opo omuxwaxwameki woshiwana  Michael Amushelelo akale atulwa moipandeko noku twalwa kefyulonghalo la Windhoek,omanga ateelela epangulo laye metitatu mongula.

Amushelelo onghela okwa holoka komesho yomangu shalandula eshi tapewa oushima menyateko  lomunambelewa wopombada wopolifi moshilongo Josheph Shikongo,  eshi ali atula facebook kutya Shikongo okwa dipaya ovanhu va 3 moshiponga shotuwa osho sha holokela mu December 2022.

Amushelelo ota pewa oushima woku lihumbatela nai omalombwelo omangu no kuulika oku hena efimaneko.

Pefimbo akala ateelela elombwelo laye okudja komangu, Amushelelo okwa yandja oushima noku nyana ovanambelewa moshikondo shouyuuki, teva hokolola kutya ovafa  ookavale kopeendjila ovo hava yandje ashike ekwafo kovapombada noku litalako vafa oikalunga moinakuwanifwa yavo.

Omutokoli Hans-Kaumbi,  ota kulopotwa ayandja oushima mepopyo la Amushelelo tati kena efimaneko.

Omutokoli okwa denga yoo omufindo kutya, Amushelelo  okwa dopa oku yandja oumbangi waasho tapopi shinasha nomapopyo olwaama mbinga.

Amushelelo okwa teelelika akale aholoka komesho yomangu metitatu.