Iipotha yo Malaria yili 15 496 oya lopotwa mokati kaanona moshilongo okuza mu December 2024

Uuministeli wuuhaku nonkalonawa owa lopota iipotha yo Malaria yili 15 496 mokati kaanona,mwa kwatelwa omaso gatatu moshilongo ashihe okuza mu December 2024.

Omupopiliko guuministeli Walters Kamaya okwa lombwele o Nampa kutya omaso agehe gatatu,ogaanona yokohi yoomvula 5.

Kamaya tati Namibia ota tsikile okutalela omashongo giipotha yo Malaria tayi londo.

Tati okuza petukuko lyomukithi mu December 2024,uuministeli owa lopota iipota 76 195 nomaso 132.

Ta gwedhako kutya aanambelewa oya kala noku pombela momagumbo,noku gandja oonete dhoomwe, noku konakona noku yamukula kiitopolwa mbyoka ya gumwa ketukuko.

Nokwiindiile aantu ya konge ekwatho meendelelo ngele oya dhidhilike omadhidhiliko go Malaria,tati o Malaria ohayi vulu oku pangwa ngele ya monikilapo kuyele.