Joseph Boakai apandula omukondjifi waye momahoololo okutambulako oidjemo.

Omupresident opo afindanapo omahoololo mo Liberia Joseph Boakai, okwa pupula kombuda omukondjifi waye momahoololo oo emudengamo nokwa kala omupresident woshilongo osho George Weah,  eshi atambulako oidjemo yomahoololo ngaashi ili.

Moshipopiwa sha Mr Boakai osho atumina oshiwana okudja mombelewa yaye yopaumwene moshilando , Monrovia, Mr Boakai okwa ulika olupandu ku Weah,  eshi atambulako oidjemo  yomahoololo ili ngaashi ili , tati osha ningwa ina putopa nande enghava,  nonande oidjemo yomahoololo yali tayuulike yeleetaamo osho tati  ina shimonika nale mondjokonona yopolitika Liberia.

Mr Boakai oo ali nale omutivali president woshilongo , ota kulopotwa okudja momahoolo adjamo nefindano lovahoololi lafikama pee  50.64%  omanga Mr Weah yee adjamo nee 49.36%.

Mr Boakai okwa teelelika aka kufeko oshipundi shoupresident muJanuary 2024,  pefimbo  Mr Weah taka djako koshipundi.

Omupresident ahoololwa okwati,  otaka tungapo omukalo welundululo leenghono doku pangela osho tashiningwa moukumwe umwe noku longela kumwe novanambelewa vepangelo laWeah oku kwashilipaleka kutya, eenghono douleli oda yandjwa pehena nande oku lififila omadu.

Mr Boakai moshipopiwa shaye okwati oshilongo shavo ina shihepa,  ashike oshili koshi yovaleli vai omo mwakwatelwa ovo vekwetele komesho oikondo yepangelo.

Okwa udaneka yoo taka dudamo onghalo yoku lunga noku litapula,  unene tuu mokati kovanambelewa vopombada tava hangwa mepangelo noku kwashilipaleka yoo kutya omaxumo komesho mwakwatelwa okutunga eendjila okwa tulwa moilonga.