Opena oolopota kutya oshipopiwa shomupresitend Ramaposa osha shangwa kwa longithwa o Artificial Intelligence

Ombelewa yomupresitend gwa South Africa otayi konakona ngele iitopolwa yimwe yoshipopiwa shomupresitend Cyril Ramaposa oshiwike sha piti oya shangwa kwa longithwa o ChatGPT yo Artificial Inteligence.

O BBC oya lopota kutya shika osha landula oolopota komalungula kutya iitopolwa yimwe yoshipopiwa sha gandjwa komutumba gwelongo komupresitend inashi za kuye nenge kaashangi yiipopiwa ye.

Omupopiliko gwe Vincent Magwenya shika okweshi tindi,tati ihaya longitha iilongitho yo  AI miipopiwa yafa mpoka.

Tati iitopolwa yoshipopiwa oya shangwa koshikondo shelongo okuza mombelewa ya Presitend ,ta gwedhako kutya otaya konakona mpoka pwazi omafekelo ngoka.

Magwenya okweendululwa kiikundaneki yomoshilongo tati elongitho lyo AI okweetapo iipopiwa itashi taambiwako,nonkatu otayi ka kuthwa ngele oolopota dhoka odhoshili.