Ramaphosa taka tulamo eindilo loku talulula elombwelo olo apewa komangu shinasha nenangeko lohamba yova Zulu.

Omupresident waSouth Africa’Cyril Ramaphosa  okwa lopotwa taka tulamo etalululo momangu  shinasha nelombwelo olo apewa komangu kutya etulo koshivalo olo ayandja kohamba ipe yova Zulu, okwe shininga shiheli pamango.

Ombelewa yomupresident momukanda oo yapitifila oikundaneki  oyati,  pefimbo  oshiningwanima shakala tashi ungaungwa nasho komangu ohamba Misuzulu oyo natango ili kolukalwa lokupangela oshiwana shova Zulu.

Enangeko lohamba  Misuzulu,  olili latulilwamo omashongo komangu yopombada yaPretoria  komumwainamati adalwa kuxe , Prince Simakade Zulu,  oo tapopi kutya oshipundi osho shapewa ohamba Misuzulu oshina okukala kwali shaye.

Ekondjelo loshipundi ola landula eshi xee yavo ohamba  Goodwill Zwelithini, axulifile mo 2021, onghalo oyo yaetififa okuhaudafana pokati kovamwainafana kombinga yaao ena okuya moipundi youhamba waxe.

King Misuzulu ota kulopotwa ali afindanapo ekondjelo loshipundi unene tuu konima eshi ali adjalekwa oshishani shouhamba kelelo lomufyuululwakalo  mu August 2022, nokwali yoo aningilwa oshivilo shopapangelo konima yeehani mbali okudja penangeko laye eshi    omuPresident Ramaphosa ali  emupa ondjapo yokumutula koshivalo kutya,  oye ohamba yatambulwako papangelo osho shali shaningilwa komesho yomangungo ovanhu omayovi nomafele.

Omangu yopombada ya Pretoria  oyayandja elombwelo kutya, omuPresident ina shikula omilandu odo dina okulandulwa okutula koshivalo ohamba Misuzulu.

Omangu oyati  Mr Ramaphosa,  oo adopa okulandula omilandu veta, okuli tapumbwa okuningilwa omakonaakono moshinima.