Epangelo inali tuma oohandimwe ya gongele iimaliwa yefumbiko lyomupresitend omukulu-Mushelenga

Ominista yomauyelele nomakwatathano gopaungomba Peya Mushelenga okwa gandja elondodho linasha naakengeleledhi taya longitha edhina lya nakusa omupresitend omukulu Hage Geingob oku kutha iimaliwa moshigwana.

Minister shika okweshi tseyitha ohela,omanga ta gandja uuyelele unasha nopolohalama yoosa dhomuleli omukulu.

Tati opena oolopota dhoohandimwe tayati otaya gongele iimaliwa yomalongekidho gefumbiko lya Geingob.

Mushelenga tati epangelo otali shi yeleke kutya inali gandja oshinakugwanithwa komuntu a gongele iimaliwa yoosa dhomupresitend omukulu.

Ta gwedhako kutya oshigwana nashi lopote kehe gumwe ngoka ta gongele iimaliwa tati oyefumbiko lyomupeesitend omukulu kopolisi.

Omukuluntu gopolisi yoshilongo Joseph Shikongo okwati ombelewa ye inayi lopotelwa oshipotha shuukengeleledhi wa tumbulwa.