Omulumenhu atulwa moipandeko, eshi akwata keenghono omukulukadi waye eli meteelelo.

Omulumenhu womido dili 37 oo tatamanekelwa oku kwata keenghono omukulukadi waye elihumbata, okwa anyenwa omito yoku lifutilamo pefimbo aholoka komesho yomangu yamagistrate wa Keetmanshoop onghela.

Omutamanekwa okwa holoka komesho yomupanguli,  Uchen Konjore, oo aundulila oshibofa  ko 11 March 2024,  opo shipitike omito ye liwanapo yomakonaakono opolifi.

Omutamanekwa pefimbo aholoka komesho yomangu,  okwa ulika kutya oteke lipopila mwene momangu, nokwa ulika ena ondjo momatamaneko aeshe opa 3 enasha nekwato keenghono oo ta kutiwa oku na ekwatafano noveta yomahepeko yo momaumbo  oni 4 yomo  2003.

Nande ongaho pefimbo lomakonaakono oo aningwapo,  omutamanekwa okwa ulika kutya oku ya kwaye moixulo nomukulukadi waye oshinima aasho shali shadja paudafano nokwe likala kutya okwa longifa eenghono okuya pamwe nomukulukadi waye.

Nande ongaho omupanguli okwati ina mbilipalelwa kouyelele oo tapewa komutamanekwa, ngaashi shili patukulwa eti 113 loveta oni 51 yo 1977.

Omukalelipo wopaveta elilepo epangelo moshinima , Gift Kambinda talombwele omangu opo omutamanekwa ahapewe manga omito yoku  lifutilamo,  molwaasho omakonaakono opolifi oku li natango pehovelo. She li kwatelela kolopota oyo yayandjwa kopolifi oya ulika kutya, omutamenekwa okwa mangelwepo metivali shalandula eshi akwata keenghono omukulukadi waye wo 37.

Mokati komatamaneko oo aningilwa omwa kwatelwa okuponda omukulukadi waye fiyo akanifa eenghono, oku mumanga keenyala no kuya naye moixulo keenghono.