Ovanhu vefike po 22 970, ove li kepango loudu wombuto yo HIV moshitopolwa sha Shikoto.

Omuvalu wovanhu vefike po  22 970 ova didilikwa veli kepango loku lelepeka ombuto youdu wo  HIV moshitopolwa sha Oshikoto oku fika mu February 2024.

Edi oda li daetwa poluhaela kwao eli omukalelipo woshikondo shouhaku moshitopolwa sha Shikoto Saara Ndjimba, pefimbo loshongalele sho commitee inasha no mukifi wo AIDS shali kOmuthiya metitatu. Okwati mokati koonakuningwa oihakanwa yomukifi ovo veli kepango omwa kwatelwa ovakainhu vefike po 15 326,   oku shiyelekanifa nomuvalu wo valumenhu wafikama po 7 644  moshitopolwa. Ta yelifa kutya omuvalu oo wa didilikwa,  owaavo vena omido 20 oku ya pombada.

Ndjimba  moshipopiwa shaye tatu omukumo oshiwana shihovele elongifo lomiti do  (PrEP)  oshoyo  (PEP) odo hadi kwafele omunhu aha ningwe oshihakanwa shombuto pefimbo aya moixulo ile momakwatafano ohonde pamwe naavo tashi dulika vena ombuto.

Lwo pokati oopo oo eli omupopiliko wo Project Hope Namibia, Fillipus Absalom okwati oprojeka yavo ota itwikile noku yandja omalongo pukululo kovanyasha veli pokati komido 14-24 shinasha  nouhaku, oixulo oshoyo oku va nghonopeka. Okwati elalakano loprojeka yavo oku kelela etandavelo loudu wombuto yo HIV mokati kovanyasha.

Oshongalele osha talika tashi tale keenghendabala doku ya komesho kombinga yolopota inasha noiyangadalwa yo HIV moshitopolwa sha Shikoto.