Ya tumbalekwa molwa iilonga pondoli yawo

Oshikandjolongo Onyuulae oshali sha unganeka oshiindingili shegandjo lyomapapa kaalongi, aalongwa, oshowo aanambelewa yelongo mboka ya longa nawa omumvo gwa ziko sha ningilwa mOnyuulae moshitopolwa shaShikoto.

Omutaleli gwelongo Abraham Nafine okwati elalakano oku pandula mboka ya longa nawa, nokutsa omukumo mboka ya hala okulonga nuudhiginini.

Ta popi kutya shika ohaye shi ningi omumvo kehe, moka haya eta pamwe oosikola adhihe moshikandjolongo, noku tsaathana omukumo.

Okwa indile aalongi naavali mboka yeli aadhani nkandangala melongo ya kondeke aanona noku ya putudhila elongo lyongushu.

Nafine okwa indile aalongwa yiitulemo miilongwa yawo molwaashoka oyo aaleli yokomongula, noyo yena oshinakugwanithwa shoku tunga oshilongo.

Mboka ya longa nawa oya pandulwa yamwe taya pewa omakopi, oonzapo nomagano.