Namibia okwa pandula epangelo lya America oku kuthamo Cuba momusholondondo  gwiilongo yo Not Fully Cooperating Countries (NFCC).

Oshikondo shepangelo lya America osha kuthamo Cuba momusholondondo go NFCC, sha landula omalunduluko ,unene sho twa tamekwa elongelokumwe lyomahangano gopaveta pokati ka America na Cuba.

Omunambelewa kuluntu muuministeli wiipambele yopashigwana nomalongelokumwe, Amb Penda Naanda momushangwa okwati Namibia ota tumbaleke etokolo lya kuthwa kepangelo lya America.

Tati Cuba okwali tango a tulwa momusholondondo go NFCC mo 2020, sho a tindi okulongela kumwe  nepangelo lya Colombia,  keindilo lyokutuma iilyo yo National Liberation Army,ongundu yuukulo.

Nepangelo lya Cuba inali yamukula keindilo lyoku tuma ko aaleli yongundu ndyoka lya tulwamo ku Colombia ,sho ongundu yati oyo ya ningi oshiponokela ko Bogota police Academy mo 2019,shoka sha dhipaga aantu 22,noku ehameka 87.

Nonando pena omalunduluko ngoka,Cuba onkee eli momusholondondo gwiilongo hayi yambidhidha uukulo,State Sponsors of terrorism,shoka Naanda a hokolola kutya kashili pauyuki,tati osheetitha iilanduli iiwinayi ku Cuba,aantu ye,neliko lye.

Naanda ta pandula wo oonkambadhala dhepangelo lya America nomapangelo galwe oku kondjitha uukulo moshitopolwa nomuuuyuni auhe,omanga teendulula eindilo  lyuulethimbo lya Namibia oku kuthamo Cuba momusholondondo go State Sponsors of Terrorism,tati inashi kalelapo uukwashili.