Aanaskola ya konda 500 moshitopolwa Oshikoto oya ninga omategelelo omumvo gwa piti

Oshikondo shelongo moshitopolwa Oshikoto osha taalela omashongo ogendji ngoka gaya moshipala iizemo yaalongwa mooskola 229 moshitopolwa.

Omupevi kuluntu gwelongo moshitopolwa Thomas Kalimbo nena okwati aalongwa aashona oyo ashike yaya ko AS Level noyaadha iipumbiwa okuya koo University.

Tati oya ndjekapo oku talelapo ooskola dhoka inaadhi shi enditha nawa,noku ninga iigoongiilonga yinasha niilongwa yefatululo lyoo curriculum,mwa kwatelwa oku nongonona iizemo pethimbo, oku tothamo iilongwa mbyoka tayi ndopwa.

Kalimbo tati omashongo gamwe oga kwatelamo omakwatathano ga kulupa,o budget inaayi gwana,oshowo ompumbwe yomeya nolusheno.

Kalimbo tati oyena ooskola 11 dhaahena omeya,noya pula uuministeli wuunamapya,omeya nomatulululo gomavi weendeleleka okugandja omeya kooskola.

Omanga ati opena woo oompangela okufula oobola kooskola moshitopolwa,payambidhidho lyelelo lyoshitopolwa Oshikoto.

Omanga tati moshitopolwa omuna ooskola 25 dhaahena olusheno,noyeli moonkundathana nuuministeli woomina okweendeleleka egandjo lyolusheno kooskola dhoka.

Pethimbo lya faathana Kalimbo okwa gwedhako wo kutya aanaskola 1 779 oya thigapo ooskola omumvo gwa piti,no 13 714 yeendulula oongundu omumvo ngoka,omanga yeli 537 ya ninga omategelelo omumvo gwa piti.