Aanona yaamati nayo oya pumbwa enkondopeko

Ehangano lyopaumwene ihaali ningi ontanitho lyo Live Out Loud olya patulula noku tula miilonga endiki lyoku kwatha aanona yaamati mOndangwa moshitopolwa shaShana.

Omukwateli komeho gopolohalama ndjoka Tabita Neshiko okwati aanona yaamati moshigwana oya taalela omashongo ogendji, ashike omolwa euveko oyendji ihaya manguluka noku popya omaudhigu gawo.

Tati okwa mono sha simana molwaashoka opuna owala oopolohalama tadhi kwathele aanona yaakadhona yo aamati taya thigala konima nonande ayehe taya pumbwa omakwatho.

Neshiko ta gwedhapo kutya oya hala woo okunkondopeka okanona okamati, ko ka tseye woo iinima ya pamba onkalathano ngaashi tashi ningilwa okanona okakadhona.

Ta tsikileko kutya ohaya tsakanene poompito odhindji nokwiikunda iipambele oyindji naanona yaamati memanguluko.

Okwa pula noku indila aavali ya kale noku tuma aanona yawo kiinyangadhalwa mbyoka tayi hwepopeke oonkalamwenyo dhawo.