Aanafalama mOutjo otaya hupu paku landitha omakala

Oshitopolwa sha Kunene osha gumwa unene koshikukuta,noku thiminika aanafalama moshikandjohogololo Outjo yiimonene iiyemo paku longa omakala.
Sha landula omimvo dha thika 10 dhomuloka gwa nkundipala neteyo inaali gwana,oshowo ekanitho lyiimuna omolwa oshikukuta,aanafalama oyendji yopapipindi moshikandjohogololo oya taalela iilanduli yi kenyeneka,nayamwe ya hupila mopolohalama yoondya dhepangelo,omanga yalwe taya longo omakala.
Kamusela gwa Outjo Johannes Antsino ohela okwati aanafalama oyendji ya Outjo oya hupila muunafalama mboka wa pumbwa omvula,shoka sha nayipaleke uuhupilo wawo omolwa oonkalo dhoombepo oombwinayi.
Kamusela tati elongo lyomakala otali ende nawa momidhingoloko,noolopota dhongaashingeyi tadhi ulike kutya opena eindjipalo lyelongo lyomakala momudhingoloko moomwedhi oonshona dha piti.
ta gwedhako wo kutya opena oopolohalama dhili metifa okulonga aanafalama omikalo omipe dhuunafalama pethimbo lyuulumbu,ashike nonando aanafalama yena ohokwe,oya taalela eshongo lyomeya gokohi yevi.