Omapopyo eendoxa doshikukuta dafelefala kaefi oshili , Susan ||Hoebes tati”

Elelo loshitopolwa sheRongo ola kupulashi omapopyo taa tandavelifwa koikundaneki yomalungula kutya,  ola kupulashi eendoxa deeshi dakusha odo da li da nuninwa oku pewa ovanhu vakumwa koshikukuta momudingonoko.

Enyamukulo lelo loshitopolwa she Rongo olalandula komakemo oshiwana shinasha noka video taka andjakanekwa koikundaneki yomakwatafano omalungula opaungoba taka monika kena eendoxa deeshi odo danuninwa omakwafelo oshikukuta momudingonoko wa Karibib tadi halakanifwapo.

Oo eli omunambelewa hapopileko elelo loshitopolwa Susan ||Hoebes meenghundafana odo ali mudo noshikundaneki sho Nampa onghela okwati, eendoxa deeshi odo tadi popiwa otadi ka kusha ashike mo  2026 ,  naado tadi ulikwa tadi halakanifwapo,  ododo da tyanghauka difike 127 datyanghauka  pefimbo dali tadi pakelwa koka forklift noku lidenga pedu pamupya.

Okwati okudja efiku olo eendoxa delidenga pedu,  okwali kwaufanwa omunambelewa woku ninga omakonaakono oikulya oo ayandja elombwelo kutya,  ka dili vali mowa woku liwa koshiwana.

Okwati eendoxa aado odali dakufwamo mudikwao noku kahalakanifwapo opo shi kelele oupyakadi mokati koshwana.

||Hoebes tayelifa kutya oka  video taka tandavelifwa komalungula okeli taka eta engwangwano mokati koshiwana osho shina oku mona omakwafo oikulya yoshikukuta, nota kayandje yoo efano kepangelo kutya  oha lipe oshiwana oikulya yaninga nai osho tati kashili mondjila.

Nande ongaho okwa twa omukumo oshiwana shilopote oupyakadi keshe taudidilikwa moikulya yoshikukuta nokwe shikunghilila yoo shilivangeke oku tandavelifa omitotolombo dihena oushili.

||Hoebes okwati elelo loshitopolwa olelitulamo moku yandja omakwafelo oikulya yoshikukuta koshiwana.