Dj Munene okwati omutumba wovakainhu omolomakaya twa taalela.

Omukokoli nokuli omukwateli komesho womutumba wo valumenhu mo Namibia Fillemon Amoolongo,  ota dimbulukifa ovakainhu aveshe moshilongo vakwashilipaleke kutya ova kufa ombinga momutumba wo vakainhu oo taukakalako oshikando shotete mo Windhoek molomakaya twa taalela.

Amoolongo oo ashiivika nawa nedina Dj Munene Shitishepungu, edi okwe dipopile oshivike sha dileko pefimbo ali atalelapo ombelwa yondjonghunana yetu yo Future Media News.

Meenghundafana pamwe naye Munene,  okwati okwa ninga etokolo okuunganeka yoo omutumba wovakainhu, konima eshi adidilika kutya ovakainhu ovena yoo ondjuulufi okukundafana omaupyakadi oo evataalela ngee tashiya momakwatafano komaupyakadi omahepeko omomaumbo.

Okwati omutumba wovakainhu oo tauka unganekwa oshikando shotete moshilongo,  ota uka unganekewa koshi yekanghameno olo taliti ‘’Otashikala nawa muholike, atushe omotuli molwoodi eli oku kondjela oomeme va kale vapopilwa’’.

Okwati pefimbo omutumba tau kakala ulimetifa,  okwa teelelika oomeme aveshe, veuye veli  momidjalo dilaula no ditoka, osho tati oshili mepola limwe no kuulika oukwao wananghali kovakainhu ovo vakanifila eemwenyo davo momadipao akenyeneka oipaihole.

Munene pefimbo leenghundafana takufileko embale omahangano oo adja momutumba noku yambidida omutumba wovakainhu udule  oku fikamifwapo.

Munene tapula oomeme aveshe ovo tave keuya veuye veli momepo yengungumano no mailikano, nokupwilikina osho tashi kelikundwa shapamba oomeme.

Okwa kunghilila yoo ootate kutya,  voo kaveli oshitopolwa shomutumba.

Omutumba ota uka ningilwa mofikola A. Shipena Secondary School,  tauka hovela po tundi 09h00.