Efano lyomupresitend Nangolo Mbumba otali kotha odoola 1800

Uuministeli womauyelele nomakwatathano gopaungomba nena owa holola pambelewa efano lyomupresitend omutine gwa Namibia ,Nangolo Mbumba.

Omunambelewa kuluntu guuministeli Dr Audrin Mathe okwa tseyitha kutya efano ngaashingeyi otali monika lyuulikwe nenge li tsilikwe moombelewa dhomahangano gepangelo nogopumwene,notali pingenapo lya nakusa Hage Geingob.

‘Geingob okwa hulitha mu February nuumvo, sho a monika okankela.

Mathe tati efano lya Mbumba otali tsikilwa pamwe nolyomukokoli presitend Sam Nujoma.

Tati efano itali ulike ashike omuhandimwe ngoka eli mombelewa yopombanda moshilongo,ashike olya kalelapo oondjodhi,oongushu nomautimaumbwile gopamuhanga goshigwana.

Ta tseyitha wo kutya onzonkundana yo Nampa otayi ka etapo noku topola efano epe lyomupresitend,ndyoka tali monika muunene wo A2 koodola 1800 ,lili mo frame,noodola 500 kwaandyoka lyaaheli mo frame.

Efano otali landwa wo koombelewa dhopashitopolwa dhuuministeli moshilongo ashihe.

Omafano gomupevi presitend Netumbo Nandi Ndeitwah nago otaga monika ngele ga pulwa.