Minister Albert Kawana, ayandja elodwelo kovapombada vo polifi velilongekidile omahoololo.

Minister woikwameni omatembu, eameno nepopilo loshiwana , Albert Kawana, okwa yandja ekumaido kovanambelewa vopolifi veli longekidile omahoololo twa taalela oo taakakalako akakaleko moshilongo neudo.

Dr. Kawana edi okwali tedipopile moshongalele shovapombada moshikondo shopolifi osho tashi ningilwa mOngwediva moshitopolwa sha Shana.

Oshongalele shoule womafiku eli 5 okwa lopotwa tashi kufwa ombinga koo commissiner oshoyo ovapedu vavo vadja moitopolwa aishe 14 yoshilongo,  opamwe yoo novakufimbinga vakwao.

Moshipopiwa shaye, Dr. Kawana okwapula ovakufimbinga moshongalele velikunde noku tala koipambele oyo taitale keunganeko lomahoololo nonghene ovanambelewa vena oku kakalekapo ombili nengumano,  omo mwakwalwa ngaashi omangudumano oyoongalele yoikonga yomaudifeko eengudu dopapolitika.

Minister okwa longifa yoo omito opo ovanambelewa vopolifi vatale momilandu veta doilonga yavo,  opo shivakwafele moku ungaunga nomashongo ataalela onghalo yefimbo eli tuli,  omo mwakwatelwa onghalo yoimbuluma, osho tati oshili mouwa weameno loshiwana neunganeko yoo lomahoololo aka kale amanguluka nokuli pauyuuki.

Pefimbo opo twoo opo oo eli Inspector General wopolifi , Joseph Shikongo, okwati oshongalele oshili omito yafimana yokutofamo omashongo noku mona omakandulepo omikundu momaupyakadi adidilikwa apalamena oshikondo sheameno.

Okwati oibofa yominyonena yakonda po 100,551  omo mwa kwatelwa omadipao, elongifo loingangamwifi, omahapeko omomaumbo, oulunga oku tumbulapo ashike imwepo,  oya didilikwa momudo wo 2023/2024.

Lieutenant General Shikongo pefimbo loshongalele tashi kakala sheya pexulilo metitano,  okwa fanekwa yoo akakale ayandja eingido lomayelayelo oilongapondoli kuvamwe vomo vakomesho vopolifi moitopolwa.

Oshongalele,  ota shiunganekwa koshi yekanghameno olo taliti ‘’Eyambidido letungululo olo talifindikile komashongo ataalela oshikondo shopolifi’’.