Omulongiskola a kuthwa miilonga okuna ondjokonona yoku geela aalongwa nomageelo ga yaga kegonga-Steenkamp

Uuministeli welongo lyopevi nuunkulungu owa holola kutya omulongiskola ngoka opo a kuthwa miilonga Petrus Ndeulita okuna ondjokonona yomageelo ga yaga kegonga,ngoka ga kutha ombinga mekutho lye miilonga.

Ndeulita okwa lalekwa miilonga sha landula oshiningwanima moka a thiminike omulongwa gondondo onti 7 a tumbe oshipundi pombanda yomutse gwe uulethimbo.

Omulongwa teekelehi oshipundi noku fadhukila kombelewa yomukuluntu skola a ka lopote oshiningwanima.

Aalongiskola naalongiskola oya ningi omunyanyo metitano lya piti,taya pula opo Ndeulita a shunwe miilonga,taati okwa kuthwa miilonga shaali pauyuki.

Omunambelewa kuluntu guuministeli Sanet Steenkamp momushangwa ohela okwa yeleke kutya ndika galyo epogolo lyotango lya Ndeulita ,molwaashoka okuna ondjokonona yiipotha  14 yomageelo ga yaga kegonga.

Tati okwali wo a pewa ompito a popile oshipotha she omanga inaa tidhwa,ashike okuulike omaihumbato omawiinayi,nokwa tindi oku holola kutya okwa mona omukanda goshipotha she.

Steenkampa tati aalongsikola ohaya gana yeli ompinge negeelo lya yaga kegonga uuna taya ulikilwa miilonga,na Ndeulita okwa gana mu 02 April 2019,ngaashi shili mokatendo koveta yelongo.

Na Steenkamp okwati ngele Ndeulita okuuvite a kuthwa miilonga shaali paveta,nena okuna uuthemba okuya kompangu.

Ndeulita okwali omulongiskola gondondo onti 8th ko Hashiyana Primary school okuza mo 2018.