Ya thika 129 ya dhipagwa omanga taya kambadhala okwiiyaka modholongo mo DRC

Epangelo lya DRC olyati aantu ya thika 129 oya dhipagwa omanga taya kambadhala okufadhukapo okuza modholongo yili mondingandinga ya Makala mo Kinshasa komatango gosondaaha,tali gwedhako kutya onkalo ngaashingeyi oyili kohi yekondololo.

Onzonkundana yo Reuters oya lopota kutya ominista yiikwameni Shabani Lukoo okwati omulilo ogwa tukuka wo metungo lyoombelewa dhodholongo,ko depot yiikulya,nokoshipangelo.

Naantu ya thika 59 oyeehamekwa.

Tati onkambadhala onene yokwiiyaka modholongo ya Makala oyeetitha wo ekanitho lyoomwenyo neyonagulo enene lyomaliko.

Kuyele omunambelewa godholongo okwa tile kapena omunadholongo eshi pondola okwiiyaka modholongo,ta gwedhako kutya mboka ya kambadhala okwiiyakamo oya dhipagwa.

Nepangelo otali konakona oshiningwanima shoka.

Oshiningwanima osha holoka ethimbo lyongula yosondaaha.