A dhipaga kuume ke kopaihole

Omulumentu gomimvo 39 okwa tulwa miipandeko, taku fekelwa a dhipaga ngoka ali kuume ke kopaihole gomimvo 35 kOshifukwa moshitopolwa shaShikoto ohela.

Olopota yopolosi ya pitithwa komunambelewa gopolosi Deputy Commissioner Titus Ekandjo oyati nakusa ngoka eli omulongiskola okwa adhika ta pandwa, sho omulumentu ngoka emu ithana anuwa okwa hala ya popye, ashike nakusa okwa tindi.

Ekandjo tati omufekelwa okwa kambadhala a dhenge nakusa nekende ashike inali mu guma.

Lwanima okwali a ka tala ombele mohauto ye noku mutsa lwiikando ine, mothingo, mombunda nomoombati nokwa hulithile poshiningwanima.

Otaku hokololwa yali mekwatathano lyopaihole uule woomwedhi 11, na nakusa okwali a lombwele omufekelwa ya hulithepo ekwatathano lyawo.

Omufekelwa ngoka ta kuti omuhingi gotaxi okwali a hadhukapo konima yoshiningwanima ashike okwaka tulwa miipandeko lwanima.

Okwa tegelelwa a holoke mompangu ya mangestrata gwaNdangwa ongula.

Nakusa okwa tongololwa oye Martha Aron naapambele oya tseyithilwa nale.