A dhipaga omuhona gwe noku ehameka gumwe

Opolosi moshitopolwa sha Oshana oya lopota omuniilonga mehangano lyoHenning Crusher mOndangwa a yaha aahona ye yaali (2) Etitano.

Shiikwatelela kuuyelele wa gandjwa komukuluntu gopolosi moshitopolwa Commisiona Naftal Sakaria, owati omufekelwa ngoka gomimvo 49 okwali a lundululwa okuza koshitayi sha Tsumeb noku etwa mOndangwa mo 2020, omolwa omaihumbato ge, ashike anuwa okwa tsikile noku ihumbata nayi.

Otaku hokololwa esiku olyo tuu ndyoka ali iithanwa kombelewa yaahona ye a shaine ombapila yekutho miilonga ashike okwa tindi.

Commisiona Sakaria tati konima yominute omishona okwali anuwa a galukile mombelewa moka a humbata Ondjembo noku tameka ta yaha aahona ye, shoka sha eta omunamimvo 43 a hulithile poshiningwanima, omanga omunamimvo 44 a ehamekwa nokwa falwa koshipangelo eli monkalo itaayi nuwa omeya.

Omufekelwa Ota kuti okwa fadhukapo konima yoshiningwanima nokathanguthangu ka gumwe gomoonakuningilwa omuyonena, ashike okwekiifala koshitaasi shopolosi mwene, taku hokololwa ayi nondjembo ndjoka a longitha.

Ota tamanekelwa oshipotha shedhipago oshowo shonkambadhala yedhipago, nomakonanono gopolosi moshiningwanima otaga tsikile.