Ya patulula embo lyomahekeleko

Elelo lyoshitopolwa shaShikoto olya tseyitha lya patulula embo lyomahekeleko, omolwa eso lya kansela goshikandjohogololo sha Guinas Elias Kainda Marthinu.

Marthinu gomimvo (51) okwa hulitha oowili dhongula yomaandaha moshipangelo shaTsumeb, taku hokololwa konima yuuwehame wethimbo efupi.

Nakusa okwali woo oshilyo sho management yelelo lyoshitopolwa, okuza sho a hogololwa mo 2020.

Omukuutumbithi gwelelo lyoshitopolwa Samuel Shivute oye a nyola tango membo ndyoka, nokwa indile aakalimo moshitopolwa ya holoke kombelewa noku gandja omahekeleko gawo.

Okwa tseyitha ya kanitha ependa ndyoka lya dhana onkandangala onene momayambulepo goshitopolwa oshowo ta tumbalekwa molwa ekuthombinga lye moku ninga omatokolo geli mondjila.