Aatembuki 16 yaadhika ya hulitha komunkulofuta gwa Tunisia

Aagameni yokomunkulofuta gwa Tunisia oyiitsu omidhimba dhaatembuki 16 komunkulofuta gondoolopa Maloulech,Salakta na Chebba.
Onzonkundana yo Reuters oya lopota kutya omidhimba odhiitsuwa mehulilo shiwike oshowo nena omandaaha,naashika oshiponga shongaashingeyi mefuta lya Med.
Iihakanwa inayi tongololwa molwaashoka omidhimba odha yoonuka,shiikwatelela komunambelewa gopombanda Houssem Eddine Jebabli.
Omwedhi gwa piti,aa Tunisia ya thika 15 oya hulitha,mwa kwatelwa aanona ya 3 aashona,no 10 oya kana,sho ombautu yawo ya ningine komunkulofuta gwa Djerba mo Tunisia,sho kwali taya kambadhala okutaaguluka efuta lya Mediterranean ya thinda ko Europe.
Omidhimba dhaantembuki 13 yo Sub Sahara Africa odhiitsuwa wo momudhingoloko gwa faathana omwedhi gwa piti.
Tunisia okwa taalela oshikele shomatembu,nokwa pingenapo Libya onga uuthikameno waa Tunisia naantu okuza palwe mu Africa oku ka konga uuhupilo ko Europe.