Omukifi upe uheshiivike watukuka mo DRC

Omukifi upe uheshiivike nale okwa lopotwa wa tukuka monoouli uninginino woshilongo Democratic Republic of the Congo (DRC).

Ehangano louhaku mounyuni WHO onghela olati, omaxwata opavali omikifi  okwaa didilikwa moitopolwa yo pavali ya DRC.

Olopota oyati okufika mo 15 Feb 2025 omuvalu wovanhu vefike po 431 ova ningwa oihakanwa yomukifi omanga 45 valopotwa vaxulifa.

Exwata lotete lomukifi olo la etelelifa omafyo ola lopotwa mo mwedi January 2025 momukunda  Boloko,  tauhangwa moshitopolwa sha  Bolomba .

Omakonaakono oo aningwapo okwa ulika kutya ovanhu veli 3 vomo mudingonoko omo veli ounona veli koshi yomido dili 5 ova xulifa konima eshi va hovela oku kwatwa koshoombo, veudite omutwe, oshimela ne telele no lwanima ovaka kwatwa ketiko lohonde.

Eelopota dopetameko oda popya kutya ounona ovo vaxulifa ovalya ombelela yo malimalima no konima ova hovela oku tukuka omadidiliko oo.

Etukuko lexwata likwao lomukifi ola lopotwa momukunda Bomate tauhangwa mo shitopolwa sha Basnkusu.

Olopota oyati etukuko lomukifi ota leendelele oku tandavela no munhu ngenge okwa ningwa oshihakanwa  moule weevili 48 oha dulu okufya.

Ehangano louhaku mounyuni WHO, ola pula ku kale kwa katukwa eenghatu do meendelelo mokuyandja omakwafo apumbiwa opo kwiiwe moshipala etandavelo lomukifi