Aa Haiti taya pula egameno omolwa oongangala

Aa Haiti omayovi oya ningi ehololomadhiladhilo moshilandopangelo Port au Prince ohela,taya pula epangelo liya gamene komakuyunguto goongangala.

Onzonkundana yo Africa news oya lopota kutya ndika olili ehololomadhiladhilo enene lyotango tali dhenge epangelo lya Alix Didier Fils Aime,uulikwa onga omupilima mu November.

Oongangala dha homata otadhi kondolola oshilandopangelo nomidhingoloko dhopopepi,nongeyo otayiindjipala omolwa okwaaha vula kwepangelo oku dhi kondolola.

Etumo tali yambidhidhwa kiigwana ya hangana ndyoka lyaahena iilongitho ya gwana nalyo itali longo sha gwana oku kondjitha oongangala.

Omakuyunguto oga thiminika aantu ya konda pomilion ya tauke omagumbo gawo.

Noongangala otadhi pewa wo ombedhi oku  yuga aantu omaliko pathiminiko,omakwatonkonga nomadhipago.

Olopota yongaashingeyi yiigwana ya hangana oyulike kutya aantu ya konda 4 200 oya dhipagwa mo Haiti okuza mu July sigo February,omanga 1 356 yeehamekwa.