Iipindi yokomumvo yaNdangwa oya pumako

Omauliko giipindi yondoolopa yaNdangwa otaga tameke Etitano sigo omasiku 5 Juli nuumvo.

Shika osha thamunwa noku kolekwa komupopiliko gwelelo Petrina Shitalangaho-Mutikisha Etiyali.

Mutikisha tati shika oshikando oshiti-12 iipindi mbika tayi kuthwa ombinga. Okwa tseyitha omwaalu gwaapindiki gwaya pombanda nuumvo oku eleka noomvula dha piti.

Ta gwedhapo kutya elalakano lyiipindi okuhanganitha, oku yambulapo eliko lyondoolopa, oku kwatakanitha noku gandja oompito kaanangeshefa yoondondo dha yooloka ya tsaathane omikumo noku ulika shoka haya longo kuyo yene.

Mutikisha ta tsikileko kutya omumvo gwaziko oyali ya yakula aayuliki yiipindi ya konda 270, yaza komahangano niikondo yopapangelo noyopaumwene oshowo aanangeshefa aashona noyopokati.

Okwati okwa longekidhwa iinyangadhalwa oyindji, nonkene okwa pula noku indila oshigwana shi holoke noku yambidhidha.

Minista yomahumithokomeho nomayambulepo giitopolwa yomoondoolopa nokomikunda James Sankwasa okwa tegelelwa aka egulule pambelewa iipindi mbyoka metiyali 1 Juli.