Omikunda 23 dha pewa oomboola 4

Epangelo oku pitila mombelewa yomupilima goshilongo olya gandja noku patulula oomboola 4 momikunda 23 moshikandjohogololo Epembe moshitopolwa shaHangwena mehulilo shiwike.

Shika osha landula sho aakalimo yaahoka ya kala ta yasi enota, noku enda oondjila oonde oku ka konga omeya ga yela.

Ta gandja oomboola ndhoka miikaha yaakwashigwana omupilima goshilongo Elijah Ngurare, okwati epangelo otali lalakanene oku gwanithapo omauvaneko galyo.

Ngurare okwa indile noku kunkilila aanyasha ya longithe omeya noku kwashilipaleka kutya oya totapo iikunino momagumbo gawo, shi ya kwathe oku longa iiyimati niikwamboga ya vule okwiimonena oondya dha gwanena yo yimwe taya landitha.

Tati epangelo olya hala opo aakalimo kiitopolwa yokomikunda ya mone omauwanawa ngaashi aakalimo yomoondoolopa, ngoka ga kwatelamo omeya, oopate, olusheno, oosikola nomauwanawa kehe geli moondoolopa.