Omido do ku lihonga mo UNAM da shunifwa pedu

Oshiputudilo shehongo lo pombada sho UNAM osha etepo elunduluko lipe me program  dehongo omo ovalihongi tava kala tave lihongo oule weedula dili  nhatu ponhele yee dula dili nhee,  odo da kalapo nale.

Edi oda popiwa kwao eli  omupopiliko woshiputudilo sho UNAM, Simon Namesho, pefimbo lenghundafana odo aninga no djo nghundana yo Future media.

Namesho tayelifa kutya, oshiputudilo osha ninga etokolo opo shi etepo eprograma dipe odo da tamekele mo 2023 noku yandja yoo eyooloko pokati kee programa dikulu naado dipe.

Okwati ovalihongi  ovo veli mo program ipe paife ota velihongo ashike oule weedula dili nhatu noku likola o degree omanga nale kwali hava ningi eedula dili nhee, opo vamone o Honours degree, tati ngeenge omulihongi okuna ehalo lo ku liwedelako akaninge o Honours degree, nena oha wedelwako  odula imwe.

Namesho, okwa wedapo tati nale okwali vena oprograma yee course  dina oule weedula nhee yo Honours degree, ashike paife ovalihongi ota vadulu ashike  oku huulila modula onhinatu ngeenge ova hala oku ka twikila nelihongo lavo nena ota va wedelwako odula imwe.

Omupopiliko okwati oshiputudilo osha katuka onghatu yatya ngaha shalandula komakemo oshiwana noko valihongi voo vene netomeno kutya omukalo weedula nhee oha ukwata unene efimbo lile.

Okwati omulandu upe ita utalikila ashike kelongo lomo shilongo,  ndee ove shitalela yoo mu Africa no pondje yenenedu.

Namesho tati  nonande paetwa elunduluko eli ongushu yelongo ina ilunduluka.