IPC okwati ina kumwa konghalo yaavo vafiyapo ongudu

Ongudu yo Independent Patriots for Change (IPC) oyati natango onghee ya fikama ke kanghameno la kola nonande oilyo yayo ili 4 yaninga etokolo loku fiyapo ongudu.

Oo eli omupopiliko wo ngudu yo IPC Immanuel Nashinge, okwa lombwela oshikundaneki sho Nampa kutya ongudu yo IPC, ota itwikile noku wanifapo omalalakano ayo ngaashi shili pamafaneko ongudu.

Nashinge ta holola kutya etokolo laavo velikufamo noku fiyapo ongudu ita shikumu omalalakano manene ongudu,  taulike kutya oinakuwanifwa no ndjodi yongudu oyo ya kalapo pamafaneko ota ipula komesho natango.

Omupopiliko okwe shikoleka kutya ongudu yo IPC, oya yakula omikanda okudja koilyo ili 4 oyo yaninga etokolo loku fiyapo ongudu yeshininga oku pitila pa WhatsApp nokwa yandja yoo omayele kwaavo va fiyapo ongudu veshininge oku pitila pamukalo wo pambelewa tashi pitile koitayi yavo oko va waiminine ongudu.

Okwe shiyelifa yoo kutya ewiliko lo IPC,  ota li ka tambulako keshe oo ena ehalo lo kufiyapo ongudu tali shingi pehena omakataeko.

Okwati yoo oshiwana shihapu shova Namibia onghee tashi twikile noku ninga oilyo yongudu yo IPC, efiku keshe nokwa halela omolo iwa oilyo i 4 oyo ya ninga etokolo loku fiyapo ongudu yo IPC, tati oshili oufemba wavo wopa udemocry.