Omunadolongo kwali mo Robben Island Lazarus Guiteb okwa xulifa

Oo ali nale omunadolongo modolongo kwali ya   Robben Island no kwa kala omunapolitika mukulukulu omukalimo womo Otjiwarongo Lazarus Guiteb, okwa mana oweenda waye.

Omupambelewa waye Sebetius Guiteb,  okwa lombwela oshikundaneki sho  Nampa  nena kutya Guiteb okwa mana oweenda waye mepipi lomido 82 axulifila moshipangelo sho paumwene tashi hangwa mo Windhoek omo akala atambulilwamo oule woivike ili 2 yaka dilongela.

Lazarus Guiteb  okwa kala atalika onga omukondjeli manguluko oo akala modolongo oule womido dili 8 mo  Robben Island mo S.A , alimo  pamwe no vakondjelimanguluko vakwao ngaashi nakufya  Herman Andimba Toivo ya Toivo, Ben Ulenga, Michael Shikongo oshoyo Ruben Itengula, okudja mo 1977 fiyo 1984.

Guiteb  okwali yoo oshilyo sho  Robben Island Prisoner Trust Fund.

Omalongekido epako laye okuli metifa oku dilila peumbo laye olo talihangwa mepandafavanda la Lourens, Orwetoveni, Otjiwarongo.