Kapuna oshimaliwa tashi shunithwako inaashi longa”Iipinge”

Ngoloneya goshitopolwa shaShana Hofni Iipinge okwati ina hala nande oku uva iimaliwa ya shunako kepangelo lyopokati, molwaasho inaayi longithwa.

Iipinge okwa popi ndhoka pethimbo a tsakanene naniikondo ya yooloka moshitopolwa nena.

Ta popi kutya ohashi yemateke unene pehulilo lyomumvo goshimaliwa, iimaliwa tayi shunako molwaashoka inaayi longithwa, nonande yena omashongo ogendji gopashimaliwa gali taga vulu oku kandulwapo.

Ngoloneya okwa tseyitha oshitopolwa sha pew oshimaliwa shoomiliona dha konda 350 omumvo goshimaliwa nguka, shoka tashi ka longithwa oku kandulapo oompumbwe moshitopolwa ashike miikondo woo ya yooloka.

Ta pula iikondo ya yooloka yi kwashilipaleke kutya oshimaliwa kehe sha gandjwa moshitopolwa osha longithwa.

Iipinge ta tsikileko kutya uuna uuministeli nomahangano ga ndopa oku longitha nawa oshimaliwa shoka ya nuninwa, nena oshigwana osho ashike hashi mono iihuna noku hepa.

Okwa pula iikondo ya yooloka yi gandje oolopota dhawo nziya kombelewa ya ngoloneya, yo tayi nkondopeke omakwatathano oshowo elongelokumwe lyawo opo ashike taya longo nuupu, noku eta omahumokomeho nomayambulepo moshitopolwa.