Minister James Sankwasa okwa ningi oshigongi naakalimo mondoolopa Katima Mulilo

Ominista yeyambulepo lyokomikunda noondolopa James Sankwasa okwa tsakanene naakalimo yomo Katima Mulilo ohela, oku pulakena omakemo gawo noku tothamo oompangela dhepangelo dha nuninwa ondoolopa.

Ta popi ko Ngweze Community Hall,Sankwasa okwa tseyitha kutya epangelo otali ka tula pamuthika omalukanda noku gandja oonzapo dhomavi kaakalimo,ta dhenge omuthindo kutya kapena omu Namibia ta kala keehena uuyene  wevi wuli nawa.

Ta dhimbulukitha aakalimo omahogololo ngoka tageya mu November,nokuya indila ya hogolole aaleli mboka yenasha nehumokomeho.

Minister ta koleke euliko lyomweendithi okuungaunga niipambele yondoolopa sha landula sho ookamusela yelelo lyondoolopa ya kuthwa miilonga omolwa endopo lyewiliko.

Aakalimo taya taambako ewiliko lye,ashike oya pula evi olindji li tulwe pamuthika,aanamagumbo mboka yeli monkugo yina onkambe ya kuthilweko koongunga dhawo,nekuthepo lyokondalaka yo Redforce Debt Management.

Minister tiindiile wo aakalimo ya tinde uukwamuhoko ,omanga koongeshefa, ya simaneke oshinakugwanitha shawo shoku shuna moshigwana, oku yambidhidha mboka ya hepa.