Ominista yemona Ericah Shafudah okwa dhenge omuthindo kutya ekwatelemo lyopashimaliwa olya simana moku shonopeka okwaaha thike pamwe noku tunga uuyamba tawu topolwa

Ta popi peegululo lyomutumba gonuumvo go Alliance for Financial Inclusion Global Policy Forum ko Swakopmund nena,Shafudah okwati Namibia okwaadha epondolo lina oonkondo,noo % 78 dhaakuluntu yena ompito yomayakulo gopashimaliwa,ondjele yaya pombanda noo % 51 oomvula 10 dha piti.

Ta tumbaleke omalundululo ngaashi iiyetwapo yopashimaliwa hayi tembuka,ashike okwa londodha kutya oo % 22 dhaa Namibia,unene aakiintu,aagundjuka,niigwana yomuushayi onkee ya patelwa pondje.

Aakuthimbinga ya konda 800,mwa kwatelwa oongoloneya yoombanga dhopokati ya konda 80 noominista oyeli moshigongi tashi kaliwa kohi yehuku:Oku nkondopeka oshigwana,oku vulitha ekoko.

Omukuluntu wiliki go AFI Alfred Hannig okwa nongele kutya omanga aantu obilion 1 ya tulwa momulandu gopashimaliwa muuyuni,aakuluntu oobilion 1.3 onkee ya patelwa pondje.

Ngoloneya go BON Johannes Qawaxab okwati  ekwatelemo lyopashimaliwa olya simana kengungumano lyopauyuni,tati ohali shunapo etumba,nokweetapo oondjila dhashili okwaadha uuyamba.