Uuministeli wuundjolowele nonkalo nawa owa dhimbulukwa esiku lyo World Radiotherapy Awereness Day koshipangelo sha Windhoek central molyomakaya

Ta popi peha lya minister Esperance Luvindao,omupevi kuluntu guuministeli Theo Ben Kandetu okwiindiile elongelokumwe lina oonkondo pokati koshikondo shuuhaku shepangelo noshopaumwene oku tanununamo ompito oku mona omapango goku hupitha oomwenyo.

Kandetu ta tumbaleke ehangano lyokankela moshilongo omolwa etsikilo lyawo oku yela noku yambidhidha, nokwiindiile aa Namibia ya kale ewi lyashili oku yanda uuyelele waaheli mondjila noku yela elongo lyomondjila lya kundukidha etakamitho lyokankela no radiotherapy.

Ta dhenge omuthindo kutya okupitila ashike moonkambadhala dhopamuhanga, oshilongo  tashi vulu oku nawapaleka iizemo yepango lyokankela, noku ndjekapo ompito yuu teginology wopashinanena wo radiotherapy.

Esiku lyo World Radiotherapy awareness Day,hali tyapulwa mosondaaha otali lalakanene oku gandja esimaneo lyo radiotherapy mepango lyokankela muuyuni auhe.