Eliko loshilongo lelitumbapo nee 1.6 per cent moshikakofimbo sha xuuninwa shomudo woneudo

Eliko loshilongo okwa teelelika li litumbepo nee 1.6 per cent moshikakofimbo sha xuuninwa shomudo woneudo.

Olopota oyati ee per cent dayandjwa ota duulike eshuno pedu okudja pee 2.8 per cent odo dali da didilikwa moshikako fimbo shotete shomudo,  omanga ee 3.3 per cent  dali dadilikwa mefimbo lafaafana mo 2024.

Shelikwatelela kolopota yapitifilwa oikundaneki okudja kombaanga yotete yopashiwana (FNB)  oyati enghundipalo la didilikwa , ola etififwa eshi oshikondo shoikwamina osho ashike sha talika tashi dana onghandangala yafimana oku kwatelapo eliko loshilongo oku shiyelekanifa nomudo wadileko.

Olopota oya ulika kutya oinyangadalwa yelongifo loipumbiwa momaumbo oya shuna pedu nee 7.2 per cent, omanga epangelo loo lalongifa eyopombada loipumbiwa yafikama pee 4.2 per cent, omapungulo okwa yambukapo nee 5.0 per cent, omanga etumo loilandomwa pondje yoshilongo loo la yapombada nee 18.5 per cent.

Omushiivi nawa moikwaliko mombaanga yo FNB Helena Mboti, okwati oidjemo ota yuulike ya etififwa kefininiko lomumbwe yoipumbiwa moshilongo.

Okwati oshikondo shopaumwene osha shuna pedu nee 7.2 per cent,  moshikakofimbo sha xuuninwa sho 2024, osho tati osha etififwa konghalo yelondo leendado doilandomwa, onghalo ya nghundipala yo kweetapo eemito doilonga oshoyo natango eyopombada lomikuli da didilikwa mokati kovakwashiwana.