Ramaposa otiindiile aahwahwameki mboka ya kwatwapo ombambyona ku Israel sho o flotilla yawo ya kondekelwa momeya gopashigwana ,ya mangululwe meendelelo

Omupresident gwa S.A Cyril Ramaposa nena okwiindiile Israel a mangulule meendelelo aahwahwameki taya yambidhidha Palestine ,mwa kwatelwa okatekulu ka Nelson Mandela,mboka yaadhika mongundu yooskepa  nenge o flotilla yomakwatho kwali yuuka mo Gaza.

Mandla Mandela opamwe nayakwawo aa S.A ya 5 oyali mo Global Sumud Flotilla ndjoka yina ooskepa dha thika 45,nelalakano lyoku teya ekondeko lya Israel moshikandjo sha Palestine, noku gandja omakwatho mo Gaza,moka iigwana ya hangana yati omwa taalela ondjala.

Onzonkundana yo AFP oya lopota kutya etanga lyomomeya lya Israel olya tameke tali kondeke ooskepa ohela ,sho lya londodha aahwahwameki kaayaye momeya,taati ogeli kohi yekondeko lye.

Ramaposa momushangwa tiindiile Israel a mangulule meendelelo aa S.A ya kwatelwa ombambyona momeya gopashigwana ,noku mangulula wo aakwashigwana yiilongo yilwe ,mboka kwali taya kambadhala okwaadha Gaza nomakwatho.

Tati oku kondeka ongundu yooskepa momeya gopashigwana oshili ompinge noveta yopashigwana ,noku pogola uuthemba woshilongo kehe, shoka epandela lyasho tali tukithwa kooskepa dhili mo flotilla.