Uutagulukilo wa Rafah moombangalantu wa Gaza otau kala wa pata sigo shaka tseyithwa kutya otau patuluka

Uutagulukilo wa Rafah moombangalantu wa Gaza otau kala wa pata sigo shaka tseyithwa kutya otau patuluka,shiikwatelela ku Israel ohela,sho o embassy ya Palestine mo Cairo yati otawu patuluka nena.

Uutagulukilo owo hawu longithwa kaa Palestine okuza nokuya moshikandjo.

O Sky news oya lopota kutya Israel okwati oku egulula uutagulukilo wa Rafah otashiikolele kunkene o Hamas tayi gwanithapo euvaneko lyawo lyompangela yombili,oku galula omidhimba adhihe 28 dhoonkwatwa.

Iikundaneki oya lopota kutya omakwatho otaga tameke okuya mo Gaza nena.

Lopokati mpoka,Israel okwati onkee a tegelela omidhimba dhoonkwatwa dhe.

O Hamas onkee inaayi galula omidhimba 26 dhomomidhimba 28 dhookwatwa dhoka dhali mo Gaza sho ompangela yayi miilonga mo 10 Kotoba.

Ongundu tayiti itayi vulu oku mona omidhimba adhihe omolwa ondjele yeyonagulo mo Gaza,ashike Israel okwati ongundu otayi fundju.

Tati o Hamas otayi vulu oku mona omidhimba adhihe ,nokudhi gandja ethimbo kehe.

O Sky news oya lopota kutya ohela o Hamas oyiitsu omudhimba gulwe,ashike kakwali gwa gandjwa omolwa iiponokela.

Ashike America okwiitaala kutya o Hamas otayi kongo omidhimba,na itayi ningile owina ,oku kateka oshikumungu shoku gandja omidhimba,noyiitulamo oku simaneka etsokumwe.