Omukuluntu gopolisi moshitopolwa shaShana Commisiona Naftal Sakaria Lungameni,  okwa tseyitha aantu ya heyali ( 7) , ya tulwa miipandeko, taya tamanekelwa oshipotha shonkambadhala yedhipago

Maria Namupala ta lopota okuziilila konooli yoshilongo okwa ti ,Otaku hokololwa shika sha landula sho omwedhi gwaziko omutamaneki omukuluntu mompangu yaNdangwa a ponokelwa, ta ehamekwa, noku tilwa omeya guuzigo.

Shiikwatelela kuuyelele mboka wa gandjwa nena, Abner Mateus a tseyika  nedhina Kapilili, oye eli a unganeke oshiningwanima shoka, nonande pethimbo sha ningwa ,okwa adhika eli mondjedhililo.

Maafekelwa omwa kwatelwa omunambelewa gopolisi Shipanga Matheus, ngoka a yakamo Kapilili mondjedhililo, nokumu fala kehala lyomainyanyudho.

Aafekelwa ayehe oya holoka nale mompangu, na Komufala Sakaria okwati onkene kwa tegelelwa yaka tule oyendji miipandeko.