Swapo oili komesho mefindano lomahoololo opaitopolwa no paikandjo

Ocommisi yomahoololo mo Namibia ECN, onguloshi yandjako oya xwatununa oidjemo  yomalelo opaitopolwa okudja meedoropa da yooloka moshilongo ashishe.

Shelikwatelela komukanda oo watuminwa oikundaneki onguloshi yandjako okudja ko ECN, owa ulika kutya eengudu ngaashi  SWAPO, IPC, UDF no PDM odo daulika da dana onghandangala yakula meenele da yooloka.

Ongudu yo SWAPO, ota yuulike ili komesho meedoropa ngaashi  Arandis, Berseba, Bethanie, Bukalo, Gochas, Okahao, Okongo, Oranjemund, Oshikuku, Ruacana, Stampriet oshoyo mo Tses.

Ongudu yo UDF yoo oya ulika ina eenghono komudingonoko wa  Khorixas, omanga ongudu yo  NUDO yoo yaulika ina eenghono komudingonoko wa Otjinene.

Komudingonoko womikunghulofuta ngaashi ko Lüderitz noko  Henties Bay koo okwa ulika ovanhu vali vaya momuvalu uli pombada oku kahoolola o ngudu yo SWAPO, oyo  taikwatele komesho mo Lüderitz,  yashikulwa kongudu yo  RP, IPC oshoyo UDF taidana onghandangala mo Henties Bay.

Momudingonoko wa Outjo efiyafano ola findanwapo kehangano lOutjo Residents Association lashikulwa  ko SWAPO.

Mo  Tsumeb, omuvalu wovanhu vedulife po 5,800 ovakufa ombinga oku hoolola  nongudu yo SWAPO oili ponomola yo tete yalandulwa ko CROT oshoyo IPC ili ponomola oni 3.

ECN momukanda talombwele oikundaneki kutya oidjemo aishe oya kwashilipalekwa kutya oili mondjila, okudja kovanambelewa ovo vali  vekwetele komesho omahoololo.