Ongundu yo  SWAPO oyeshi enditha nawa momahogololo guukamusela melelo lyoshilando sha Windhoek

Ongundu yo  SWAPO oyeshi enditha nawa momahogololo guukamusela melelo lyoshilando sha Windhoek ,sho ya mono iipundi 8 yomiipundi 15 ,okuyeleka nomahogololo ga tetekele,sho kwali ya zimo niipundi itano.

Iizemo yahugunina ya  tseyithwa komunashipundi gokomisi yomahogololo Elsie Nghikembua,aahogololi 72 522 okwali ya hogolola,nongundu yo SWAPO ya mona omawi 38 004,okuyeleka nomawi 20 250 momahogololo gomo 2020,sho kwali ya zimo niipundi itano,noku kanitha ekondololo lyoshilandopangelo oshikando shotango.

Ongundu yo IPC ndjoka ya zililemo nomawi ogendji momahogololo gomo 2020 geli 14 028,oya zimo nomawi 11 859,noku mona iipundi itatu momahogololo gonuumvo.

Oongundu oonkwawo dhoompilameno odha mona  wo omawi omashona .

Ongundu yo AR kwali yazimo niipundi iyali nomahogololo gomo 2020 nomawi 8 501,oya mono ashike oshipundi shimwe nomawi 5 262 momahogololo gonuumvo.

Ongundu yo LPM nayo oya zi piipundi iyali,nomawi 7 365 momahogololo gomo 2020,noku mona omawi 4 410 momahogololo gonuumvo.

‘Ongundu yo PDM oya mono oshipundi shimwe,noya mona omawi omashona oku yeleka nomahogololo gomo 2020,omanga o UDF yina oshipundi shimwe sho ya zimo nomawi 1 861.

Omanga momahogololog ga faathana,ongundu yo National Democratic Party ya thigala noshipundi shawo shimwe, sho ya mono omawi 877 mondoolopa ya Katima Mulilo.

O NDP oyili ponomola ontiyali ya landula ongundu yo SWAPO,ndjoka yina iipundi 3 okuza momawi gawo 3 819.

Ongundu yo IPC oyeya ponomola onti 3 nomawi 385,oku mona oshipundi shimwe ,nomawi galwe 495 ga topolwa mokati koongundu dhoopolitoka dhoka dha kutha ombinga momahogololo.

Simasiku Mukendwa go NDP okuli ponomola yotango momusholondondo,nokuli kamusela awike gondoolopa oku shuna melelo lyondoolopa ya Katima Mulilo okuza mewiliko lya tetekele,ndyoka lya kuthwa miilonga ku minister James Sankwasa mu August omolwa ewiliko pambambo,noku ndopa okutula miilonga omalombwelo guuministeli.

Mukendwa okwa tegelelwa a langekwe opamwe nookamusela aape yo SWAPO,Royd Likando, Charity Matongo-Mabuku, Kamwi Mazila, Nsala Muhongo na Kabende Kabende.

Jimmy Sikwela ,kamusela go IPC okwa tegelelwa a kuthepo oshipundi shaguhunina shomiipundi iheyali melelo lyondoolopa ya Katima Mulilo.