Ehangano lyo Namwater olya taalela oongunga dhomeya dhili poodola oobilion 2.8

Ehangano lyo Namwater olya lopota lya dhidhilika eindjipalo lyoongunga,dhoka dhaadha oodola oobilion 2.8 okuthika mo 30 November nuumvo,dha kalelapo eindjipalo lyoodola oomilion 387.

Eindjipalo ndika olya kalelapo eindjipalo lyoo % 15 okuza moodola oobilion 2.4 dhoka dha dhidhilikwa mu Feb nuumvo,noku holola uupyakadhi woku futa tau koko,mboka tauyi moshipala uukalipo weandjaganeko lyomeya guuwindji moshilongo,nokuulika wo oshiponga oshinene kegameno lyomeya moshilongo.

Momushangwa gwa pitithwa kehangano ,o Namwater oya dhenge omuthindo kutya omanga omeya geli eyakulo lya simana,oku opaleka omeya,okuga pungula noku ga fala kiitopolwa, osha pumbwa oonzo dhoshimaliwa.

Nokwaaha futa omeya otaku yi moshipala oku vula kwehangano oku longa,oku opaleka omakwatathano ngoka ga kulupa, noku tanununamo omayakulo kiigwana mbyoka ya pumbwa omayakulo.