Ewilio lo NEFF la talelapo omupresident peumbo lepangelo

Omupresident woshilongo Netumbo Nandi Ndaitwah onghela okwali eya oku talelwapo kewiliko longudu yo Namibia Economic Freedom Fighters (NEFF) peumbo lepangelo.

Etalelepo lewiliko lo NEFF olili oshitopolwa shelombwelo olo layandjelwe komutwe woshilongo omudo wadileko pefimbo ali tapopifa oshiwana omo ali eshiyelifa nghene ombelewa yaye yamanguluka okuya meenghundafana no valeli veengudu dopolitika moshilongo.

Pefimbo leenghundafana davo omu President okwa yelifa nghene eenghundafana da kwatelamo ovaleli vopolitika dili da fimana moku kwatela komesho oshilongo.

Omuleli waNamibia tapopi nghene apumbwa omayele newedelepo nghene ena oku kwatala komesho oshilongo, osho tati otashiningwa melongelokumwe neengudu dopolitika.

Osheendo shewiliko lo NEFF oshali sha kwatelwa komesho komupresident wongudu Epafras Mukwiilongo, opamwe nomupedu president  Kalimbo Iipumbu, ovo vaulika eudo nawa lavo eshi vamona omito okuya meenghundafana napresident.

Meenghudafana davo oilyo yongudu yo NEFF oya ulika yoo omalimbililo akuma oikondo ya yooloka osho shakwatelamo oshikondo shouhaku, ounamapya, oikwanghono oshoyo elunduluko longhalo yomepo, no va yandja yoo omayele avo nghene vatala onghalo ta idulu okweetelwa elunduluko.

President okwa tambulako nomaoko ashambekela omafaneko oo aetwa poluhaela kewiliko lo NEFF, no kwa popya yoo nghene epangelo lili lelitulamo mokutala komakandulepo omikundu atalela oikondo yatofwamo ko   NEFF.

Etalelepo lavo ola talika laeta oidjemo no madilongo mawa omo ovaleli aveshe vaulika nghene afimana mokweeta elunduluko koshiwana sha Namibia, no ku xumifa komesho omayambulepo oshilongo osho tashiningwa ina kutalika kutya okwadja kongudu ilipipo.