Erginus Endjala iindile okomisi yomahogololo ya Namibia yi landule Venezuela moku ninga omahogololo

Omukuluntu gwetumo lya Namibia komahogololo ga Venezuela Erginus Endjala ,okwiindile okomisi yomahogololo yi landule iikumungu yomahogololo ga Venezuela.

Moonkundathana no Nampa ohela sha landula etseyitho kutya Nicolas Maduro oye a sindana omahogololo,Endjala okwa hokolola omahogololo kutya oga ningwa momukalo gwa ngungumana,guunganekwa,gwa manguluka,noguli pauyuki.

Maduro okwigiidhwa omusindani noo % 51 dhomawi,omanga omuulikwa gompilameno Edmundo Gonzalez a zimo noo % 44 dhomahogololo ga ningwa osondaaha.

Endjala tati omahogololo mo Venezuela ogopaungomba,naahogololi otaya thindi ashike poka button komuulikwa hogololwa gwawo  keshina lyomahogololo.

Shampa omuhogololi a hogolola,ta pewa okambaapila kutya okwa hogolola,nokambaapila taka tulwa mepakete lyomahogololo.

Tati omahogololo oga ningwa ashike muule wesiku 1,nokonima yomahogololo,iizemo ayihe oya gongelwa ko system.