Congo okwa taalela omutenge go Mpox

Congo okwa lopota iipotha iipe yo Mpox ya konda 1000 moshiwike sha piti sigo ometiyali,sho omalelo guuhaku mu Africa ga pula oontutila oku kondjitha oshiponga shika oshinene mu Africa.
Ehangano lyuundjolowele muuyuni olyiigidha etukuko lyo Mpox mu Africa onga oshikele shuuhaku shopaulumompumbwe.
Omanga o Mpox ya lopotwa miilongo 12 ya Africa,Congo oye a lopota iipotha oyindji,yili 17 794 okuza miipotha 18 910 mbyoka ya lopotwa mu africa nuumvo, nomaso 535 gomomaso 541.
Muule woshiwike sha piti,Congo okwa lopota iipotha 1 030,shiikwatelela komiyalu dho Africa CDC.
Omukuluntu go Africa CDC Jean Kaseya okwati oya yakula euvaneko lyootuntila dho Mpox dhili 215 000 okuza ko EU nokehangano lyoku nduluka ootuntila lyo Bavarian Nordic,tadhi thiki muule womasiku omashona.
America okwati wo ota gandja ootuntila 50 000 dhotuntila ya faathana ku Congo,omanga Japan naye a gandja ootuntila ku Congo.
Ashike otashu ulike kutya africa okwa pumbw aoshindji,nominista yuuhaku mo Congo yati oshilongo she osha pumbwa ootuntila oomilion 3 oku hulithapo etukuko,ndyoka lyiihanena kiishiindalongo yopopepi yili 4 mu Africa.