Elelo loshilando sha Windhoek latula moilonga oshivike shomalongo pukululo enasha noupyakadi woikwamwifi.

Elelo loshilando sha Windhoek onghela ola tula moilonga oshikonga shoule woshivike osho tashi yandje omapukululo elongo oku henuka eetepo loikwamwifi mewangadjo.

 Etulomoilonga loshinyangadalwa ola hovelifwa nomaulikilo elongifo loyeendifo yo komalusheno.

Oshiindingili oshakufa ombinga okudja onghela mo 16-22 September 2024, osho tashi lalakanene oku yandja omalongo pukululo koshiwana kombinga youpyakadi welunduluko longhalo yomepo oshoyo oku xwaxwameka omikalo doku kalekapo oukoshoki momidiingonoko.

Efiku olo hali dimbulukiwa alushe paiwana oku kelala ekakeko loikwamwifi mewangadjo , ohali dimbulukiwa alushe keshe komudo mo 21 September , nolatalika lili omito okutwa omukumo ovanhu, eengeshefa oshoyo omapangelo ashunife pedu omikalo doikwamwifi mewangadjo noku kalekapo omikalo odo dililepo oukoshoki womewangadjo.

Oo eli mayora welelo loshilando shaWindhoek  Queen Kamati,  pefimbo letulomoilonga loshiindingili,  onghela okwa twa omukumo keshe umwe akufe ombinga moku kalekapo eameno loukoshiki womudingonoko.

Kamati tapopi kutya oshiwana ota shipumbwa shikufe ombinga paife,  eshi pefimbo eli elelo loshilando la taalela omashongo omumbwe yomeva oo tati okwa etififwa konghalo yelunduluko lomepo.

Oshivike osho ita shipopile ekakeko haleetififwa koikwamwifi, oshatalika shili oshitopolwa shoinyangadalwa younyuni oyo tai xwaxwameke omikalo doku henuka oilongifo loihauto nokutwa oshiwana omukumo shilongife omikalo dokweenda kolupadi, elongifo loufangufangu ile oku longifa oyeendifo oyo hailongifwa kovanhu vahapu moshiwana (yopashiwana)

Kamati tapula oshiwana pefimbo eli taku dimbulukiwa oshiindingili oule woshivike,  ovanhu va henuke oku londa moihauto osho tati ota shuulike eyambididlo lavo moku kalekapo onakwiiwa yelelo loshilando sha Windhoek.