Elelo loshilando sha Windhoek latula moilonga oprojeka yolusheno momalukanda amwepo.

Ovakalimo molukanda la Okatunda oshoyo omidingonoko dopoushiinda moshikandjo hoololo sha Tobias Hainyeko onghela ovali veya momuvalu uli pombada oku ninga eedombwedi detulomoilonga loprojeka yolusheno momudingonoko wavo.

Etulomoilonga loshinyangadalwa shokuyandja olusheno kovakalimo okwa teelelika shika yandje ouwa komaumbo vefike po 803 okudja momalukanda ngaashi Okuryangava , Havana, no  Otjomuise.

Olopota yapitifwa kelelo loshilando sha Windhoek, taishiyelifa kutya elelo ota lika dika yoo omalamba olusheno efiku po 15 meenele dayooloka domalukanda a Windhoek.

Olopota tayuulike kutya oprojeka aayo oili oshitopolwa shomafaneko atulwapo momido dili 5 dilikomesho opo elelo liyandje omayakulo olusheno kovakalimo tava hangwa momaumbo akonda po 4,000.

Olopota oya yelifa kutya oprojeka yoku yandja olusheno koshiwana , oili payambidido loshimaliwa shepangelo osho tashiningwa okupitila mouminsitry weemina noikwanghono oshoyo ouminsitry womayambulepo eedoropa nomaushai koshimaliwa shee  N$ 18 million.

Pefimbo tatula moilonga oprojeka oo eli mayora welelo loshilando sha Windhoek

Queen Omagano Kamati, okwa denga omufindo nghene elelo loshilando sha Windhoek lili lelitulamo mokweeta elunduluko meenghalo nawa dovakalimo.

Okwati olusheno olili lafimana koshiwana oku yandja ouyelele, noku etapo yoo eemito dayooloka ngaashi dopangeshefa.

Pefimbo opo twoo opo oo eli ominsiter yomaushai nomayambulepo eedoropa Erastus Uutoni,  okwe sheendulula nghene epangelo tali longo noudiinini oku kwashilipaleka kutya oshiwana osha pewa omayakulo oo tashipumbwa.

Oshiindingili oshali shakufwa ombinga kee councillor delelo nopashitopolwa dayoooloka, omo mwakwatelwa  Councillor Christopher Likuwa, oo takutiwa oye ayandja oshipopiwa sholupandu na  Cllr Ottilie Ukule, ye ali atambulako ovaenda.

photo: Contributed