Ovataleli vomahoololo mo Mozambique, ovati omahoololo okwali momepo yombili

Osheendo shetumo lovataleli vomahoololo osho sha andjakanekelwa mo  Mozambique,  oshati omahoololo oo ali moshilongo osho mo 10 October  okwali pambili no shatwa omukumo ovanhu voshilongo osho vakale momepo yengungumano omanga oidjemo taipitifwamo.

Eelopota odati oidjemo yomahoololo mo Mozambique, oya fanekwa ika kale yapitifwamo moule woshivike twa taalela,  ashike omifododolo doidjemo yopetameko oyo yapitifwamo ota duulike ongudu yo  Frelimo,  oyo ili komesho nefindano.

Moshondaxa ocommisi yomahoololo mo Mozambique (CNE) oyali ya shiivifa oidjemo yoshilando pangelo Maputo, omo ongudu yo  Frelimo mewiliko la Daniel Chapo,  yamonamo efindano lee 54%.

Ongudu ya Chapo,  nayo ota yuulike yoo ili komesho nefindano moitopolwa imwepo ngaashi omoshitopolwa sha Tete.

Osheendo shovataleli tashitu omukumo oshiwana shikale mengungumano omanga oidjemo taipitifwamo.

Lwopokati oopo ovataleli vetumo ovo vakalelapo oilyolongo yomayambulepo oumbuwanhu wa Africa (SADC) ,  ovati omahoololo okwali awanifapo oipumbiwa aayo taipumbiwa kehangano, osho kwatelamo oufemba woshiwana, oufikepamwe, oshoyo oyuuki.