Omumbwe younduda voku likwafelela, taitwikile noku tandavelifa omikifi.

Omuvalu wovanhu vefike po 6517  ovalopotwa vaningwa oihakanwa yomukifi woHepatitis E  moNamibia okudja muDecember 2017 fiyo oneudo, noku twaalela eemwenyo dovanhu vefike po 55 .

Shelikwatelela kwao eli omupedu minsiter wonghalo nawa noudjolowele, Esther Muinjangue, okwati omumbwe yoku hena oukoshoki osho shimwe shomoyeetififi yomukifi oo,  nowa didilikwa unene moilyo longo youmbuwanhu wa Africa oshoyo moilyo longo imwepo mounyuni.

Muinjangue  edi okwali tedi popi mefiku loku dimbuluka efiku lounduda voku likwafelela mounyuni,  efiku oolo moNamibia latalika tali dimbulukiwa oshikando shotete okudja nghene latulilwe koshivalo shoku kala hali dimbulukiwa mo 2013,  kehangano loiwana yahangana.

Omupedu minsiter okwati etata lomuvalu woshiwana sha Namibia onghee hashilikwafelele meenele dihena eameno loku likwafelela ngenge oushitwe tawiifana,  osho tati oshili sha kuma ouhaku nonghalo nawa yoshiwana unene ounona oshoyo oomeme ovo velihumbata.

Shelikwatelela kuminsiter okwati olopota youhaku oyo yapitifilwe momwedi wa October 2022 oshoyo October 2023, oya ulika kutya  oshitopolwa shErongo osha lopotwa sha didilikwa omuvalu wovanhu vaningwa oihakanwa yoshimela shili mumwe nohonde vefike po  1334,  noku twaalela eemwenyo dovanhu veli 4 omo mwakwatelwa okanona kamwe keli koshi yomido dili 5 nava 3 veli koshi yomido 18.